കോമാളി

കാണികൾ ഒഴിഞ്ഞപ്പോൾ 

തിരശ്ശീലകളെല്ലാം വലിച്ചു കീറി,

" നോക്കൂ, എനിക്ക് സന്തോഷമാണെന്ന്"

ഒരു കോമാളി നൃത്തം ചവിട്ടുന്നു

കയ്യടിക്കാൻ ആരുമില്ലാത്ത നിശ്ശബ്ദതയിലേയ്ക്ക് നോക്കി

"നോക്കൂ, എനിക്ക് സന്തോഷമാണെന്ന്"

ഇരു കവിളത്തും ആഞ്ഞടിക്കുന്നു

നേരെ നോക്കുമ്പോൾ തലകീഴ് കാണുന്ന കാഴ്ചകളെ നിലയ്ക്ക് നിർത്താൻ,

"നോക്കൂ, എനിക്ക് സന്തോഷമാണെന്ന്"

തല കുത്തി നിൽക്കുന്നു

മൈതാനത്തിനപ്പുറം പിടഞ്ഞു കരയുന്ന നഗരത്തെ തലോടിയുറക്കാൻ,

"നോക്കൂ, എനിക്ക് സന്തോഷമാണെന്ന്"

താരാട്ടു പാടുന്നു

സ്നേഹിച്ചു പോയവരെ പൊട്ടിച്ചിരിപ്പിക്കാൻ

ഒടുവിൽ, ഒരു കയറിൻ തുമ്പത്ത്

"നോക്കൂ, എനിക്ക് സന്തോഷമാണെന്ന്"

ഇളകിയാടുന്നു