തലയുരിഞ്ഞിട്ടും

വലിച്ചെറിഞ്ഞ മൊബൈല്‍ നിലത്തുകിടന്ന് ചിലയ്ക്കുന്നു

ആരോ സന്ദേശമയച്ചിട്ടുണ്ട്

ഒരു പക്ഷേ, ജീവിതത്തെ മറ്റൊന്നാക്കാന്‍ പോന്നത്

എടുത്തു നോക്കുമ്പോള്‍ 
പതിവു ലോണടഞ്ഞതിന്‍റെ നന്ദിവാചകം

ഊതിപ്പെരുപ്പിച്ച ബലൂണുകളെല്ലാം പൊട്ടിത്തീര്‍ന്നിരിക്കുന്നു

പലകുറി എറിഞ്ഞോടിച്ചിട്ടും, 
മോങ്ങിയും ഞെരങ്ങിയും
വാലാട്ടിക്കൊണ്ടൊരു പട്ടി പിന്നെയും മുറ്റത്ത്

എല്ലാ ഉത്തരത്തിലും 
പ്രാണവേദനയോടെ ഒരു പല്ലി ചിലയ്ക്കുന്നു
താഴെ, ഉരിഞ്ഞിട്ട വാല്‍ 
ജീവന്‍റെ അവസാന ഓര്‍മകളെ കുടഞ്ഞു കളയുന്നു